Үр дүнд суурилсан удирдлага

МОНГОЛ УЛСЫН ТӨРИЙН АЛБА

Үр дүнд суурилсан нэгдсэн удирдлага нь хөгжлийн бодлого төлөвлөлт, төсөвлөлт, хэрэгжилт, тайлагнал, хяналт-шинжилгээ, үнэлгээ, боловсон хүчний удирдлагын төлөвлөгөөг хооронд нь системчлэн уялдуулан, бүх шатанд стратегийн гүйцэтгэлийн удирдлагыг бий болгож, нотолгоонд суурилсан шийдвэр гаргалтыг дэмждэг удирдлагын болон төлөвлөлтийн цогц тогтолцоо юм.

Бодлогын үр дүнг тодорхойлохдоо дээрээс доош буюу ерөнхийгөөс нарийвчилсан луу төлөвлөх аргачлалыг ашиглаж, шаталсан байдлаар асуудлыг тодорхойлж, үндсэн шалтгааныг илрүүлэх нь оновчтой байдаг:

• Хөгжлийн нэгдсэн төлөвлөлт. Хөгжлийн бодлого төлөвлөлтийг босоо болон хөндлөн чиглэлд системтэйгээр нэгтгэсэн, үр дүн, нөлөөлөл дээр төвлөрнө.

• Үр дүнд суурилсан төсөвлөлт. Үр дүнд суурилсан бодлого төлөвлөлтийг бодитой болгон хэрэгжүүлэхэд шаардлагатай санхүүжилтийг хуваарилах төсөв, санхүүгийн удирдлагын системийг ашиглана.

• Боловсон хүчний гүйцэтгэлийн систем. Ажилтнуудын ажлын гүйцэтгэлийг бодит үр дүнгийн гүйцэтгэлтэй системтэйгээр уялдуулна.

• Хяналт-шинжилгээ, үнэлгээ. Үр дүнгийн гүйцэтгэлийн хэрэгжилтэд бүх шатанд системтэйгээр мониторинг хийж, алдааг засах, суралцах эргэх холбоо бүхий процессоор дамжуулан хэрэгжүүлнэ.

• Удирдлагын мэдээллийн систем. Нотолгоонд суурилсан шийдвэр гаргалтад нэгдсэн цахим системийг ашиглана.